काठमाडौं, जेठ । प्रमुख विपक्षी नेकपा एमालेले प्रमुख निर्वाचन आयुक्त डा. अयोधीप्रसाद यादवमाथि महाअभियोग दर्ताको तयारी गरेको छ । एमाले उच्च स्रोतका अनुसार महाअभियोग प्रयोजनका लागि पार्टीका सांसदहरुको हस्ताक्षर संकलन गरिएको छ । चितवनको भरतपुर महानगरपालिका १९ नम्बर वडामा पुनः निर्वाचन गराउन खोजेको भन्दै एमालेले यादवविरुद्ध महाअभियोगको तयारी गरेको एक नेताले बताए । एमालेले भरतपुरको रोकिएको मतगणना तत्काल अघि बढाउन माग गर्दै आएको छ ।
सोही माग राखेर एमालेले व्यवस्थापिका–संसद बैठक अवरुद्ध गर्दै आएको छ । सत्तारुढ काँग्रेस–माओवादी गठबन्धनले भने उक्त वडामा पुनः मतगणना गराउन माग गरेको छ । ‘सत्तापक्षको मतियार बनेर पुनः निर्वाचन गराउने निर्णय गरे प्रमुख निर्वाचन आयुक्तविरुद्ध महाअभियोग लगाउने तयारी भएको छ’, ती नेताले भने, ‘हस्ताक्षर संकलन गरेर ठीक्क पारेर राखेका छौं । जतिबेला आयोगको निर्णय आउँछ, त्यति नौ बेला महाअभियोग दर्ता हुन्छ ।’ संसदमा तत्काल कायम सदस्य संख्या (५९३) को एक चौथाई (१५७) जनाले महाअभियोग दर्ता गर्न सक्छन् । त्यसका लागि एमाले एक्लै काफी छ । एमालेका संसदमा १ सय ८१ सांसद छन् । एक चौथाईले महाअभियोग दर्ता गरे यादव तत्काल पदबाट निनम्बनमा पर्नेछन् । यसअघि बर्खस्तीमा परेका अख्तियार दुरुपयोग अनुसन्धान आयोगका तत्कालीन प्रमुख लोकमानसिंह कार्की र प्रधानन्यायाधीश सुशीला कार्की महाअभियोग दर्ता भएसँगै निलम्बनमा परेका थिए । अख्तियार प्रमुख कार्की महाअभियोग प्रस्तावमा संसदले निर्णय नगर्दै अयोग्यतासम्बन्धी मुद्दामा सर्वोच्च अदालतको फैसलाबाट बर्खास्तीमा परेका थिए । सुशीलाको भने सर्वोच्चले महाअभियोग प्रस्ताव नै खारेज गरिदिएकाले उनी पुनः अदालत फर्केकी थिइन् । भरतपुर महानगरको मतगणनाका क्रममा एमाले र माओवादी गणकबीच विवाद हुँदा गत आइतबार राति ९० वटा मतपत्र च्यातिएको थियो । एमालेले माओवादी कार्यकर्ताले मतपत्र च्यातेको आरोप लगाउँदै आएको छ । काँग्रेस–माओवादी गठबन्धनले भने एमाले मेयरका उम्मेदवार देवी ज्ञवाली पराजित हुने भएपछि एमालेले नै षड्यन्त्रपूर्वक मतपत्र च्यातेको आरोप लगाउँदै आएका छन् ।
मतपत्र च्यातिएको घटना छानबिनका लागि आयोगले सह–महान्यायाधिवक्ता गीताप्रसाद तिमल्सिना नेतृत्वमा गृह मन्त्रालयका सहसचिव र नेपाल प्रहरीका डिआईजी सम्मिलित तीन सदस्यीय छानबिन समिति गठन गरेको थियो । समितिले घटनास्थलको स्थगगत अनुगमनका साथै प्रमुख निर्वाचन अधिकृत, प्रमुख जिल्ला अधिकारी, सुरक्षा निकाय तथा जिल्लास्थित राजनीति दलका प्रमुखलगायतसँग सोधपुछ गरेर प्रतिवेदनसमेत बुझाइसकेको छ । तर, निर्वाचन आयोगले भने मतगणना सुरु गर्ने वा पुनः निर्वाचन गर्ने भन्ने निर्णय गर्न सकेको छैन । एमालेले आयोग र उसले गठन गरेको छानबिन समितिको निस्पक्षतामा प्रश्न उठाउँदै आएको छ ।काठमाण्डु टुडेबाट
Home / समाचार
/ एमालेले गर्यो प्रमुख निर्वाचन आयुक्त यादवविरुद्ध महाअभियोग लगाउने यस्तो तयारी, सांसदहरुद्धारा हस्ताक्षर संकलन,यादव सत्तापक्षको मतियार बनेको एमालेको आरोप
एमालेले गर्यो प्रमुख निर्वाचन आयुक्त यादवविरुद्ध महाअभियोग लगाउने यस्तो तयारी, सांसदहरुद्धारा हस्ताक्षर संकलन,यादव सत्तापक्षको मतियार बनेको एमालेको आरोप
Reviewed by adas
on
June 03, 2017
Rating: 5
Subscribe to:
Post Comments
(
Atom
)
0 comments:
Post a Comment