काठमाडौँ, ३० असार, नयाँ श्रव्यदृष्य विद्युतीय माध्यम ‘जनता टेलिभिजन’को यहाँ शुभारम्भ गरिएको छ । प्रधानमन्त्री एवं नेपाली काँग्रेसका सभापति शेरबहादुर देउवाले सो टेलिभिजनको शुभारम्भ गर्दै सत्यतथ्यमा आधारित भएर आलोचना गर्न सञ्चारमाध्यमलाई आग्रह गरेका छन् ।
“मिडियाले राजनीतिकर्मीलाई गाली गर्नु, आलोचना गर्नुलाई मैले सकारात्मक रूपमा नै लिएको छु, तर सत्यतथ्यमा आधारित आलोचना होस्, समाचार पनि सत्यतथ्य होस्”, प्रधानमन्त्री देउवाले भने ।
आगामी असोज २ गते २ नं प्रदेशको स्थानीय तहको तेस्रो चरणको निर्वाचनका साथै माघ ७ भित्र प्रदेश र सङ्घको समेत निर्वाचन गर्ने सरकारको योजना रहेको प्रधानमन्त्री देउवाको भनाइ छ ।
कार्यक्रममा नेकपा एमाले का वरिष्ठ नेता झलनाथ खनालले पछिल्लो पटक आमसञ्चारमाध्यमको गुणात्मकभन्दा पनि सङ्ख्यात्मक वृद्धि भइरहेका असन्तोष व्यक्त गर्दै यसको गुणात्मक वृद्धिमा जोड दिए ।
नेकपा माओवादी केन्द्रका नेता नारायणकाजी श्रेष्ठले पछिल्लो पटक सञ्चारमाध्यमले जनताका विषयभन्दा पनि बढी मात्रामा राजनीतिक समाचारलाई महत्व दिएकामा असन्तोष व्यक्त गरे ।
‘जनता टेलिभिजन’का अध्यक्ष डा विजयकुमार पौडेलले जनताको लगानीमा जनताका लागि सञ्चालित आफ्नो टेलिभिजनले जनताकै विषयलाई बढी महत्वका साथ प्रसारण गर्ने प्रतिबद्धता व्यक्त गरे ।
विसं २०७४ वैशाख २० गतेदेखि परीक्षण प्रसारण सुरू गरेको सो टेलिभिजनले बिहीबारदेखि नियमित प्रसारण सुरू गरेको हो । रासस
0 comments:
Post a Comment